{๗๙๕} มาคธิกนฺติ มคเธสุ ชาตํ ฯ มคธรฏฺเฐ ชาตํ ลสุณเมว หิ อิธ ลสุณนฺติ อธิปฺเปตํ ฯ ตํปิ ภณฺฑิกลสุณเมว น เอกทฺวิติมิญฺชกํ ฯ กุรุนฺทิยํ ปน ชาติเทสํ อวตฺวา มาคธิกํ นาม ภณฺฑิกลสุณนฺติ วุตฺตํ ฯ อชฺโฌหาเร อชฺโฌหาเรติ เอตฺถ สเจ เทฺว ตโย ภณฺฑิเก เอกโตเยว สงฺฆริตฺวา อชฺโฌหรติ เอกํ ปาจิตฺติยํ ฯ ภินฺทิตฺวา เอเกกํ มิญฺชํ ขาทนฺติยา ปน ปโยคคณนาย ปาจิตฺติยานีติ ฯ

{๗๙๗} ปลณฺฑุกาทีนํ วณฺเณน วา มิญฺชาย วา นานตฺตํ เวทิตพฺพํ ฯ วณฺเณน ตาว ปลณฺฑุโก นาม ปณฺฑุวณฺโณ โหติ ภญฺชนโก โลหิตวณฺโณ หรีตโก หรีตปณฺณวณฺโณ ฯ มิญฺชาย ปน ปลณฺฑุกสฺส เอกมิญฺชา โหติ ภญฺชนกสฺส เทฺว หรีตกสฺส ติสฺโส จาปลสุโณ อมิญฺชโก ฯ องฺกุรมตฺตเมว หิ ตสฺส โหติ ฯ มหาปจฺจริยาทีสุ ปน ปลณฺฑุกสฺส ตีณิ มิญฺชานิ ภญฺชนกสฺส เทฺว หรีตกสฺส เอกนฺติ วุตฺตํ ฯ เอเต ปลณฺฑุกาทโย สภาเวเนว วฏฺฏนฺติ ฯ สูปสมฺปากาทีสุ ปน มาคธิกํปิ วฏฺฏติ ฯ ตํ หิ ปจฺจมาเนสุ มุคฺคสูปาทีสุ วา มจฺฉมํสวิกติยา วา เตเล วา พทรสาลวาทีสุ วา อมฺพิลสากาทีสุ วา อุตฺตริภงฺเคสุ วา ยตฺถ กตฺถจิ อนฺตมโส ยาคุภตฺเตปิ ปกฺขิปิตุํ วฏฺฏติ ฯ เสสํ อุตฺตานเมว ฯ

เอฬกโลมสมุฏฺฐานํ กิริยา โนสญฺญาวิโมกฺขํ อจิตฺตกํ ปณฺณตฺติวชฺชํ กายกมฺมํ วจีกมฺมํ ติจิตฺตํ ติเวทนนฺติ ฯ

ลสุณสิกฺขาปทํ ปฐมํ ฯ