{๘๓๕} ทสเม ฯ ยงฺกิญฺจิ นจฺจนฺติ นฏาทโย วา นจฺจนฺตุ โสณฺฑา วา อนฺตมโส โมรสุวมกฺกฏาทโยปิ สพฺพเมตํ นจฺจเมว ฯ ยงฺกิญฺจิ คีตนฺติ นฏาทีนํ วา คีตํ โหตุ อริยานํ ปรินิพฺพานกาเล รตนตฺตยคุโณปสํหิตํ สาธุกีฬิตคีตํ วา อสญฺญตภิกฺขูนํ ธมฺมภาณกคีตํ วา สพฺพเมตํ คีตเมว ฯ ยงฺกิญฺจิ วาทิตนฺติ ตนฺติพทฺธาทิวาทนียภณฺฑํ วา โหตุ กูฏเภรีวาทิตํ วา อนฺตมโส อุทกเภรีวาทิตํปิ สพฺพเมตํ วาทิตเมว ฯ {๘๓๖} ทสฺสนาย คจฺฉติ อาปตฺติ ทุกฺกฏสฺสาติ ปทวารคณนาย อาปตฺติ ทุกฺกฏสฺส ฯ ยตฺถ ฐิตา ปสฺสติ วา สุณาติ วาติ เอกปฺปโยเคน โอโลเกนฺตี ปสฺสติ เตสํเยว คีตํ วาทิตํ สุณาติ เอกเมว ปาจิตฺติยํ ฯ สเจ ปน เอกํ ทิสํ โอโลเกตฺวา นจฺจํ ปสฺสติ ปุน อญฺญโต โอโลเกตฺวา คายนฺเต ปสฺสติ อญฺญโต วาเทนฺเต ปาเฏกฺกา อาปตฺติโย ฯ ภิกฺขุนี สยํปิ นจฺจิตุํ วา คายิตุํ วา วาทิตุํ วา น ลภติ ฯ อญฺเญ นจฺจ คาย วาเทหีติ วุตฺตํปิ น ลภติ ฯ เจติยสฺส อุปหารํ เทถ อุปาสกาติ วตฺตุํปิ ตุมฺหากํ เจติยสฺส อุปฏฺฐานํ กโรมาติ วุตฺเต สาธูติ สมฺปฏิจฺฉิตุํปิ น ลภติ ฯ สพฺพตฺถ ปาจิตฺติยนฺติ สพฺพอฏฺฐกถาสุ วุตฺตํ ฯ ภิกฺขุโน ทุกฺกฏํ ฯ ตุมฺหากํ เจติยสฺส อุปฏฺฐานํ กโรมาติ วุตฺเต ปน อุปาสก อุปฏฺฐานกรณํ นาม สุนฺทรนฺติ วตฺตุํ วฏฺฏติ ฯ {๘๓๗} อาราเม ฐิตาติ อาราเม ฐิตา อนฺโตอาราเม วา พหิอาราเม วา นจฺจาทีนิ ปสฺสติ วา สุณาติ วา อนาปตฺติ ฯ สติ กรณีเยติ สลากภตฺตาทีนํ วา อตฺถาย อญฺเญน วา เกนจิ กรณีเยน คนฺตฺวา คตฏฺฐาเน ปสฺสติ วา สุณาติ วา อนาปตฺติ ฯ อาปทาสูติ ตาทิเสน อุปทฺทเวน อุปทฺทูตา สมชฺชฏฺฐานํ ปวิสติ เอวํ ปวิสิตฺวา ปสฺสนฺติยา วา สุณนฺติยา วา อนาปตฺติ ฯ เสสํ อุตฺตานเมว ฯ

เอฬกโลมสมุฏฺฐานํ กิริยา โนสญฺญาวิโมกฺขํ อจิตฺตกํ โลกวชฺชํ กายกมฺมํ อกุสลจิตฺตํ ติเวทนนฺติ ฯ

ทสมสิกฺขาปทํ ฯ

ลสุณวคฺโค ปฐโม ฯ