{๙๗๓} ทสเม ฯ อาหุนฺทริกาติ สมฺพาธา ฯ {๙๗๕} ธุรํ นิกฺขิตฺตมตฺเตติ สเจปิ ธุรํ นิกฺขิปิตฺวา ปจฺฉา ปกฺกมติ อาปตฺติเยวาติ อตฺโถ ฯ ปวาเรตฺวา ปญฺจ โยชนานิ คจฺฉนฺติยาปิ อนาปตฺติ ฯ ฉสุ วตฺตพฺพเมว นตฺถิ ฯ สเจ ปน ตีณิ คนฺตฺวา เตเนว มคฺเคน ปจฺจาคจฺฉติ น วฏฺฏติ ฯ อญฺเญน มคฺเคน อาคนฺตุํ วฏฺฏติ ฯ

{๙๗๖} อนฺตราเยติ ทสวิเธ อนฺตราเย ฯ คจฺฉิสฺสามีติ นิกฺขนฺตา นทีปูโร ปน อาคโต โจรา วา มคฺเค โหนฺติ เมโฆ วา อุฏฺฐาติ นิวตฺติตุํ วฏฺฏติ ฯ เสสํ อุตฺตานเมว ฯ ปฐมปาราชิกสมุฏฺฐานํ อกิริยา สญฺญาวิโมกฺขํ สจิตฺตกํ โลกวชฺชํ กายกมฺมํ อกุสลจิตฺตํ ทุกฺขเวทนนฺติ ฯ

ทสมํ ฯ

ตุวฏฺฏวคฺโค จตุตฺโถ ฯ