{๑๐๗๗} ตติเย ฯ สิกฺขาสมฺมตึ ทาตุนฺติ กสฺมา ทาเปติ ฯ มาตุคาโม นาม โลโล โหติ เทฺว วสฺสานิ ฉสุ ธมฺเมสุ อสิกฺขิตฺวา สีลานิ ปูรยมาโน กิลมติ สิกฺขิตฺวา ปน ปจฺฉา น กิลมิสฺสติ นิตฺถริสฺสตีติ ทาเปสิ ฯ {๑๐๗๙} ปาณาติปาตา เวรมณึ เทฺว วสฺสานิ อวีติกฺกมสมาทานํ สมาทิยามีติ ยํ ยํ ปาณาติปาตา เวรมณีติ ปญฺญตฺตํ สิกฺขาปทํ ตํ ปาณาติปาตา เวรมณีสิกฺขาปทํ เทฺว วสฺสานิ อวีติกฺกมิตพฺพสมาทานํ กตฺวา สมาทิยามีติ อตฺโถ ฯ เอส นโย สพฺพตฺถ ฯ อิมา ฉ สิกฺขาโย สฏฺฐิวสฺสายปิ ปพฺพชิตาย ทาตพฺพาเยว ฯ น เอตาสุ อสิกฺขิตา อุปสมฺปาเทตพฺพา ฯ

ตติยํ ฯ