{1119} Kumārībhūtavaggassa paṭhamadutiyatatiyasikkhāpadāni tīhi gihigatasikkhāpadehi sadisāneva. Yā pana tā sabbapaṭhamā dve mahāsikkhamānā tā atikkantavīsavassāti veditabbā tā gihigatā vā hontu agihigatā vā sikkhamānā icceva vattabbā. Gihigatāti vā kumārībhūtāti vā na vattabbā. Gihigatāya dasavassakāle sikkhāsammatiṃ datvā dvādasavassakāle upasampadā kātabbā. Ekādasavassakāle datvā terasavassakāle kātabbā. Dvādasaterasa- cuddasapaṇṇarasasoḷasasattarasaaṭṭhārasavassakāle sammatiṃ datvā vīsativassakāle upasampadā kātabbā. Aṭṭhārasavassakālato paṭṭhāya ca panāyaṃ gihigatātipi kumārībhūtātipi vattuṃ vaṭṭati. Kumārībhūtā pana gihigatāti na vattabbā. Kumārībhūtā icceva vattabbā. Mahāsikkhamānā pana gihigatātipi vattuṃ na vaṭṭati. Kumārībhūtātipi vattuṃ na vaṭṭati. Sikkhāsammatidānavasena pana tissopi sikkhamānāti vattuṃ vaṭṭati.

Tatiyaṃ.