{664} Dutiye pārājike. Kaccino sāti kaccinu sā. Avaṇṇoti aguṇo. Akittīti nindā. Ayasoti parivāravipatti parammukhagarahā vā. {666} Sā vā ārocetīti yā pārājikaṃ āpannā sā sayaṃ vā āroceti. Aṭṭhannaṃ pārājikānaṃ aññataranti bhikkhūhi sādhāraṇānaṃ catunnaṃ asādhāraṇānaṃ ca catunnameva aññataraṃ. Idañca pārājikaṃ pacchā paññattaṃ tasmā aṭṭhannanti vibhaṅge vuttaṃ. Purimena pana saddhiṃ yugalakattā imasmiṃ okāse ṭhapitanti veditabbaṃ. Dhuraṃ nikkhittamatteti dhure nikkhittamatte. Vitthārakathā panettha sappāṇakavaggamhi duṭṭhullasikkhāpade vuttanayeneva veditabbā. Tatra hi pācittiyaṃ idha pārājikanti ayameva hi viseso. Sesaṃ tādisameva. {665} Vajjapaṭicchādikāti idaṃpi imissā pārājikāya nāmamattameva tasmā padabhājane na vicāritaṃ. Sesamettha uttānameva. Dhuranikkhepasamuṭṭhānaṃ kāyavācācittato samuṭṭhāti akiriyā saññāvimokkhaṃ sacittakaṃ lokavajjaṃ kāyakammaṃ vacīkammaṃ akusalacittaṃ dukkhavedananti.

Dutiyapārājikaṃ.