{898-899} Catutthe. Pañca ahāni pañcāhaṃ. Pañcāhameva pañcāhikaṃ. Saṅghāṭīnaṃ vāro saṅghāṭivāro. Paribhogavasena vā otāpanavasena vā saṅghaṭitaṭṭhena saṅghāṭīti laddhanāmānaṃ pañcannaṃ cīvarānaṃ parivattananti attho. Tasmāyeva padabhājane pañcamaṃ divasaṃ pañca cīvarānītiādimāha. Āpatti pācittiyassāti ettha ca ekasmiṃ cīvare ekā āpatti pañcasu pañca.

{900} Āpadāsūti mahagghacīvaraṃ na sakkā hoti corabhayādīsu paribhuñjituṃ evarūpe upaddave anāpatti. Sesaṃ uttānameva. Kaṭhinasamuṭṭhānaṃ akiriyā nosaññāvimokkhaṃ acittakaṃ paṇṇattivajjaṃ kāyakammaṃ vacīkammaṃ ticittaṃ tivedananti.

Catutthasikkhāpadaṃ.