TIPITAKA Volume 3 : PALI ROMAN Vinaya Pitaka Vol 3 : Vinaya. Bhikkhunī Kumārībhūtavaggassa ekādasamasikkhāpadaṃ

[435] Tena samayena buddho bhagavā rājagahe viharati veḷuvane kalandakanivāpe . tena kho pana samayena thullanandā bhikkhunī Sikkhamānaṃ vuṭṭhāpessāmīti there bhikkhū sannipātetvā pahūtaṃ khādanīyaṃ bhojanīyaṃ passitvā na tāvāhaṃ ayyā sikkhamānaṃ vuṭṭhāpessāmīti there bhikkhū uyyojetvā devadattaṃ kokālikaṃ kaṭamorakatissakaṃ khaṇḍadeviyā puttaṃ samuddadattaṃ sannipātetvā sikkhamānaṃ vuṭṭhāpeti 1- . Yā tā bhikkhuniyo appicchā .pe. tā ujjhāyanti khīyanti vipācenti kathaṃ hi nāma ayyā thullanandā pārivāsikacchandadānena sikkhamānaṃ vuṭṭhāpessatīti .pe. saccaṃ kira bhikkhave thullanandā bhikkhunī pārivāsikacchandadānena sikkhamānaṃ vuṭṭhāpetīti. Saccaṃ bhagavāti. {435.1} Vigarahi buddho bhagavā kathaṃ hi nāma bhikkhave thullanandā bhikkhunī pārivāsikacchandadānena sikkhamānaṃ vuṭṭhāpessati netaṃ bhikkhave appasannānaṃ vā pasādāya .pe. evañca pana bhikkhave bhikkhuniyo imaṃ sikkhāpadaṃ uddisantu {435.2} yā pana bhikkhunī pārivāsikacchandadānena sikkhamānaṃ vuṭṭhāpeyya pācittiyanti.