TIPITAKA Volume 3 : PALI ROMAN Vinaya Pitaka Vol 3 : Vinaya. Bhikkhunī Chattupāhanavaggassa tatiyasikkhāpadaṃ

[454] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena aññatarā bhikkhunī aññatarissā itthiyā kulupikā hoti . athakho sā itthī taṃ bhikkhuniṃ etadavoca handayye imaṃ saṅghāṇiṃ amukāya nāma itthiyā dehīti . athakho sā bhikkhunī sacāhaṃ pattena ādāya gacchāmi vissaro me bhavissatīti paṭimuñcitvā agamāsi . tassā rathiyāya suttake chinne vippakiriyiṃsu . manussā ujjhāyanti khīyanti vipācenti kathaṃ hi nāma bhikkhuniyo saṅghāṇiṃ dhāressanti seyyathāpi gihiniyo kāmabhoginiyoti. {454.1} Assosuṃ kho bhikkhuniyo tesaṃ manussānaṃ ujjhāyantānaṃ khīyantānaṃ vipācentānaṃ . yā tā bhikkhuniyo appicchā .pe. tā ujjhāyanti khīyanti vipācenti kathaṃ hi nāma bhikkhunī saṅghāṇiṃ dhāressatīti .pe. saccaṃ kira bhikkhave Bhikkhunī saṅghāṇiṃ dhāretīti 1- . saccaṃ bhagavāti . vigarahi buddho bhagavā kathaṃ hi nāma bhikkhave bhikkhunī saṅghāṇiṃ dhāressati netaṃ bhikkhave appasannānaṃ vā pasādāya .pe. evañca pana bhikkhave bhikkhuniyo imaṃ sikkhāpadaṃ uddisantu {454.2} yā pana bhikkhunī saṅghāṇiṃ dhāreyya pācittiyanti.