TIPITAKA Volume 3 : PALI ROMAN Vinaya Pitaka Vol 3 : Vinaya. Bhikkhunī Ārāmavaggassa aṭṭhamasikkhāpadaṃ

[355] Tena samayena buddho bhagavā sakkesu viharati kapilavatthusmiṃ nigrodhārāme . tena kho pana samayena chabbaggiyā bhikkhū bhikkhunūpassayaṃ upasaṅkamitvā chabbaggiyā bhikkhuniyo ovadanti . bhikkhuniyo chabbaggiyā bhikkhuniyo etadavocuṃ ethayye ovādaṃ gamissāmāti . Yaṃpi 1- mayaṃ ayye gaccheyyāma ovādassa kāraṇā ayyā chabbaggiyā idheva āgantvā amhe ovadantīti . yā tā bhikkhuniyo appicchā .pe. tā ujjhāyanti khīyanti vipācenti kathaṃ hi nāma chabbaggiyā bhikkhuniyo ovādaṃ na gacchissantīti .pe. saccaṃ kira bhikkhave chabbaggiyā bhikkhuniyo ovādaṃ na gacchantīti . saccaṃ bhagavāti. Vigarahi buddho bhagavā kathaṃ hi nāma bhikkhave chabbaggiyā bhikkhuniyo ovādaṃ na gacchissanti netaṃ bhikkhave appasannānaṃ vā pasādāya .pe. evañca pana bhikkhave bhikkhuniyo imaṃ sikkhāpadaṃ uddisantu {355.1} yā pana bhikkhunī ovādāya vā saṃvāsāya vā na gaccheyya pācittiyanti.