TIPITAKA Volume 3 : PALI ROMAN Vinaya Pitaka Vol 3 : Vinaya. Bhikkhunī Naggavaggassa dasamasikkhāpadaṃ

[253] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena aññatarena upāsakena saṅghaṃ uddissa vihāro kārāpito hoti. So tassa vihārassa mahe ubhatosaṅghassa akālacīvaraṃ dātukāmo hoti . tena kho pana samayena ubhatosaṅghassa kaṭhinaṃ atthataṃ hoti . athakho so upāsako saṅghaṃ upasaṅkamitvā kaṭhinuddhāraṃ yāci. Bhagavato etamatthaṃ ārocesuṃ. {253.1} Athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi anujānāmi bhikkhave kaṭhinaṃ uddharituṃ evañca pana bhikkhave kaṭhinaṃ uddharitabbaṃ . byattena bhikkhunā paṭibalena saṅgho ñāpetabbo suṇātu me bhante saṅgho yadi saṅghassa pattakallaṃ saṅgho kaṭhinaṃ uddhareyya . esā ñatti . suṇātu me bhante saṅgho saṅgho kaṭhinaṃ uddharati . yassāyasmato khamati kaṭhinassa uddhāro so tuṇhassa yassa nakkhamati so bhāseyya . uddhataṃ saṅghena kaṭhinaṃ. Khamati saṅghassa tasmā tuṇhī. Evametaṃ dhārayāmīti.