[๙๔-๗] อตฺถมญฺญายาติ ปาฬิอตฺถมญฺญาย. ธมฺมมญฺญายาติ ปาฬิธมฺมมญฺญาย. ๑- ปารายนนฺติ เอวํ อิมสฺส ธมฺมปริยายสฺส อธิวจนํ อาโรเปตฺวา เตสํ พฺราหฺมณานํ นามานิ กิตฺตยนฺตา ๒- "อชิโต ฯเปฯ พุทฺธเสฏฺฐมุปาคมุนฺ"ติ อาหํสุ. ตตฺถ สมฺปนฺนจรณนฺติ นิพฺพานปทฏฺฐานภูเตน ปาติโมกฺขสีลาทินา สมฺปนฺนํ. อิสินฺติ มเหสึ.

นิทฺเทเส อุปาคมึสูติ สมีเป คมึสุ. อุปสงฺกมึสูติ อวิทูรฏฺฐานํ คมึสุ. ปยิรุปาสึสูติ สมีเป นิสีทึสุ. ปริปุจฺฉึสูติ ปริปุจฺฉํ อาปาทยึสุ. ๓- ปริปญฺหึสูติ ๔- ตุลยึสุ. "โจทยึสู"ติ เกจิ.

สีลาจารนิปฺผตฺตีติ อุตฺตมสีลาจารนิปฺผตฺติ, ๕- มคฺเคน นิปฺผนฺนสีลนฺติ อตฺโถ.

คมฺภีเรติ อุตฺตานภาวปฏิกฺเขปวจนํ. ทุทฺทเสติ คมฺภีรตฺตา ทุทฺทเส, ทุกฺเขน ทฏฺฐพฺเพ, น สกฺกา สุเขน ทฏฺฐุํ. ทุทฺทสตฺตาว ทุรนุโพเธ, ๖- ทุกฺเขน อวพุชฺฌิตพฺเพ, น สกฺกา สุเขน อวพุชฺฌิตุํ. สนฺเตติ นิพฺพุเต. ปณีเตติ อคฺคปฺปตฺเต. ๗- อิทํ ทฺวยํ โลกุตฺตรเมว สนฺธาย วุตฺตํ. อตกฺกาวจเรติ ตกฺเกน น อวจริตพฺเพ น โอคาหิตพฺเพ น ๘- ญาเณเนว อวจริตพฺเพ. นิปุเณติ สเณฺห. ปณฺฑิตเวทนีเยติ สมฺมาปฏิปนฺเนหิ ปณฺฑิเตหิ เวทิตพฺเพ.