นปฺปกาสตีติ นปฺปกาโส โหติ. นปฺปภาสตีติ ญาณปฺปภาสํ น กโรติ. น ตปตีติ ญาณตปํ ๓- น กโรติ. น วิโรจตีติ ญาณวิโรจนํ น กโรติ. น ญายตีติ ๔- น ชานียติ. น ปญฺญายตีติ นปฺปญฺญายเต.

เกน ลิตฺโตติ เกน ลิมฺปิโต. ปลิตฺโต อุปลิตฺโตติ ๑- อุปสคฺเคน ปทํ วฑฺฒิตํ. อาจิกฺขาหิ ๒- นิทฺเทสวเสน. เทเสหิ ๓- ปฏินิทฺเทสวเสน ปญฺญเปหิ ๔- เตน เตน ปกาเรน. อตฺถํ โพเธนฺโต ปฏฺฐเปหิ. ๕- ตสฺส ตสฺสตฺถสฺส การณํ ทสฺเสนฺโต วิวราหิ. ๖- พฺยญฺชนภาวํ ทสฺเสนฺโต วิภชาหิ. ๗- นิกฺกุชฺชิตภาวํ คมฺภีรภาวญฺจ หริตฺวา โสตูนํ ญาณสฺส ปติฏฺฐํ ชนยนฺโต อุตฺตานีกโรหิ. ๘- สพฺเพหิปิ อิเมหิ อากาเรหิ โสตูนํ อญฺญาณนฺธการํ วิธเมนฺโต ปกาเสหีติ ๙- เอวมตฺโถ ทฏฺฐพฺโพ.

[๒] เววิจฺฉา ปมาทา นปฺปกาสตีติ มจฺฉริยเหตุ จ ปมาทเหตุ จ นปฺปกาสติ. มจฺฉริยํ หิสฺส ทานาทีหิ คุเณหิ ปกาสิตุํ น เทติ, ปมาโท สีลาทีหิ. ชปฺปาภิเลปนนฺติ ตณฺหา อสฺส โลกสฺส มกฺกฏเลโป วิย มกฺกฏสฺส อภิเลปนํ. ทุกฺขนฺติ ชาติอาทิกํ ทุกฺขํ.