Sandiṭṭhikanti lokuttaradhammo yena adhigato hoti, tena parasaddhāya gantabbataṃ hitvā paccavekkhaṇañāṇena sayaṃ daṭṭhabboti sandiṭṭhiko, taṃ sandiṭṭhikaṃ. Attano phalaṃ dānaṃ sandhāya nāssa kāloti akālo, akāloyeva akāliko. Yo ettha ariyamaggadhammo, so attano samanantarameva phalaṃ detīti attho, taṃ akālikaṃ. Ehi passa imaṃ dhammanti evaṃ pavattaṃ ehipassavidhiṃ arahatīti ehipassiko, taṃ ehipassikaṃ. Ādittaṃ celaṃ vā sīsaṃ vā ajjhupekkhitvāpi attano citte upanayaṃ arahatīti opanayiko, taṃ opanayikaṃ. Sabbehipi ugghatitaññūādīhi "bhāvito me maggo, adhigataṃ phalaṃ. Sacchikato nirodho"ti attani attani veditabbanti paccattaṃ veditabbaṃ viññūhi.

[109] Atha naṃ bāvarī āha "kinnu tamhā"ti dve gāthā.

Muhuttampīti thokampi. Khaṇampīti na bahumpi. Layampīti manampi. Vayampīti koṭṭhāsampi. Addhampīti divasampi.

[111-13] Tato piṅgiyo bhagavato santikā avippavāsameva dīpento "nāhaṃ tamhā"tiādimāha. Nāhaṃ yo me .pe. Passāmi naṃ manasā cakkhunā vāti taṃ buddhaṃ maṃsacakkhunā viya manasā passāmi. Namassamāno vivasemi rattinti namassamānova rattiṃ atināmemi.