@4 ka. nipajjamāno 5 ka. uttariṃ 6 ka. tīraṃ pāpuṇiṃ 7 ka. samupallavinti Ubhinnampi sappāyaṃ viditvā piṅgiyameva ālapamāno "yathā ahū vakkalī"ti imaṃ gāthaṃ abhāsi.

Tassattho:- yathā vakkalitthero saddhādhimutto ahosi, saddhādhureneva arahattaṃ pāpuṇi, yathā ca soḷasannaṃ eko bhadrāvudho nāma, yathā ca āḷavigotamo ca. Evameva tvampi pamuñcassu suddhaṃ, tato saddhāya adhimuccanto "sabbe saṅkhārā aniccā"tiādinā nayena vipassanaṃ ārabhitvā maccudheyyassa pāraṃ nibbānaṃ gamissatīti arahattanikūṭena desanaṃ niṭṭhāpesi, desanāpariyosāne piṅgiyo arahatte, bāvarī anāgāmiphale patiṭṭhahi, bāvaribrāhmaṇassa sissā pana pañcasatā sotāpannā ahesuṃ.

Tattha muñcassūti mocassu. Pamuñcassūti mocehi. Adhimuñcassūti tattha adhimokkhaṃ karassu. Okappehīti bahumānaṃ uppādehi. Sabbe saṅkhārā aniccāti hutvā abhāvaṭṭhena. Sabbe saṅkhārā dukkhāti dukkhamanaṭṭhena akkhamaṭṭhena. Sabbe dhammā anattāti avasavattanaṭṭhena.

[118] Idāni piṅgiyo attano pasādaṃ nivedento "esa bhiyyo"tiādimāha. Tattha paṭibhānavāti paṭibhānapaṭisambhidāya upeto. Bhiyyoti uparūpari.