@3 cha.Ma. ayaṃ pāṭho na dissati 4 cha.Ma. ca 5 cha.Ma. vahati

@6 cha.Ma. upakkilesā

Paṇḍito pana bhikkhu obhāsādīsu uppannesu vikkhepaṃ agacchanto "obhāsādayo dhammā, na maggo, upakkilesavimuttaṃ pana vīthipaṭipannaṃ vipassanāñāṇaṃ maggo"ti maggañca amaggañca vavatthapeti. Tassevaṃ "ayaṃ maggo, ayaṃ amaggo"ti ñatvā ṭhitaṃ ñāṇaṃ maggāmaggañāṇadassanavisuddhīti vuccati. Ito paṭṭhāya aṭṭhannaṃ vipassanāñāṇānaṃ vasena sikhāpattaṃ vipassanāñāṇaṃ navamañca saccānulomikañāṇanti ayaṃ paṭipadāñāṇadassanavisuddhi nāma hoti. Udayabbayānupassanāñāṇaṃ bhaṅgānupassanāñāṇaṃ bhayatupaṭṭhānañāṇaṃ ādīnavānupassanāñāṇaṃ nibbidānupassanāñāṇaṃ muñcitukamyatāñāṇaṃ paṭisaṅkhānupassanāñāṇaṃ saṅkhārupekkhāñāṇanti imāni aṭṭha ñāṇāni nāma. Navamaṃ saccānulomikañāṇanti anulomassetaṃ nāmaṃ.