A. 1/109 2 cha.Ma. yathodhikānīti 3 cha.Ma. kaddame 4 Ma.mū. 12/166/129

@5 ka. yampīdaṃ 6 cha.Ma. sippaṭṭhānena 7 cha.Ma. sabbampetaṃ 8 sutta. A. 1/111

[148] Aṭṭhamagāthāya dutiyapāde jālanti suttamayaṃ vuccati. Ambūti udakaṃ, tattha caratīti ambucārī, macchassetaṃ adhivacanaṃ. Salile ambucārī salilambucārī. Tasmiṃ nadīsalile jālaṃ bhetvā ambucārī vāti vuttaṃ hoti. Tatiyapāde daḍḍhanti daḍḍhaṭṭhānaṃ vuccati. Yathā aggi daḍḍhaṭṭhānaṃ puna na nivattati, na tattha bhiyyo āgacchati, evaṃ maggañāṇagginā daḍḍhaṃ kāmaguṇaṭṭhānaṃ anivattamāno, tattha bhiyyo anāgacchantoti vuttaṃ hoti, sesaṃ vuttanayamevāti.

Saññojanānīti yassa saṃvijjanti, taṃ puggalaṃ vaṭṭasmiṃ saññojenti bandhantīti saññojanāni. Imāni pana saṃyojanāni kilesapaṭipāṭiyāpi āharituṃ vaṭṭati maggapaṭipāṭiyāpi. Kāmarāgapaṭighasaññojanāni anāgāmimaggena pahīyanti, mānasaññojanaṃ arahattamaggena. Diṭṭhivicikicchāsīlabbataparāmāsā sotāpattimaggena, bhavarāgasaññojanaṃ arahattamaggena, issāmacchariyāni sotāpattimaggena, avijjā arahattamaggena. Maggapaṭipāṭiyā diṭṭhivicikicchāsīlabbataparāmāsaissāmacchariyā sotāpattimaggena pahīyanti, kāmarāgapaṭighā anāgāmimaggena, mānabhavarāgaavijjā arahattamaggenāti. Bhinditvāti bhedaṃ pāpetvā. Sambhinditvāti chiddaṃ katvā. Dālayitvāti phāletvā. Padālayitvāti hīretvā sampadālayitvāti upasaggena padaṃ vaḍḍhitaṃ.