āsevamāno muditañca kāle"ti

tattha āsevamānoti tisso tikacatukkajjhānavasena upekkhaṃ catutthajjhānavasena bhāvayamāno. Kāleti mettaṃ āsevitvā tato vuṭṭhāya karuṇaṃ, tato vuṭṭhāya muditaṃ, tato itarato vā nippītikajjhānato vuṭṭhāya upekkhaṃ āsevamānova "kāle āsevamāno"ti vuccati, āsevituṃ phāsukāle vā. Sabbena lokena avirujjhamānoti dasasu disāsu sabbena sattalokena. Avirujjhamāno. Mettādīnaṃ hi bhāvitattā sattā appaṭikūlā honti, sattesupi virodhabhūto paṭigho vūpasamati. Tena vuttaṃ "sabbena lokena avirujjhamāno"ti sesaṃ vuttasadisamevāti.

Navamaṃ.

[160] Dasame saññojanānīti dasa saññojanāni, tāni ca tena tena maggena sandālayitvāna. Asantasaṃ jīvitasaṅkhayamhīti jīvitasaṅkhayo vuccati cuticittassa paribhedo, tasmiṃ ca jīvitasaṅkhaye jīvitanikantiyā pahīnattā asantasanti. Ettāvatā saupādisesanibbānadhātuṃ attano dassetvā gāthāpariyosāne anupādisesāya nibbānadhātuyā parinibbāyīti.