[19] Apucchasīti ettha aiti padapūraṇamatte nipāto, pucchasitveva attho. Pavakkhāmi yathā pajānanti yathā pajānanto ācikkhati, evaṃ ācikkhissāmi. Upadhinidānā pabhavanti dukkhāti taṇhādiupadhinidānā jātiādidukkhavisesā pabhavanti.

Taṇhūpadhīti taṇhā eva taṇhūpadhi. Sassatucchedadiṭṭhi eva diṭṭhūpadhi. Rāgādikilesā eva kilesūpadhi. Puññādikammāni eva kammūpadhi. Tividhaduccaritāni eva duccaritūpadhi. Kabaḷīkārādayo āhārā eva āhārūpadhi. Dosapaṭigho eva paṭighūpadhi. Kammasamuṭṭhānā kammeneva gahitā paṭhavādayo catasso dhātuyova catasso upādinnadhātūpadhī. Cakkhvādi cha ajjhattikāni āyatanāni eva cha ajjhattikāni āyatanūpadhi. Cakkhuviññāṇādi cha viññāṇakāyāva cha viññāṇakāyūpadhī. Sabbampi dukkhaṃ dukkhamanaṭṭhenāti sabbaṃ tebhūmakaṃ dukkhaṃ dussahanaṭṭhena upadhi.

[20] Evaṃ upadhinidānato pabhavantesu dukkhesu:- yo ve avidvāti gāthā. Tattha pajānanti saṅkhāre aniccādivasena jānanto. Dukkhassa jātippabhavānupassīti vaṭṭadukkhassa jātikāraṇaṃ "upadhī"ti anupassanto. Imissā gāthāya niddese vattabbaṃ natthi.