Nappakāsatīti nappakāso hoti. Nappabhāsatīti ñāṇappabhāsaṃ na karoti. Na tapatīti ñāṇatapaṃ na karoti. Na virocatīti ñāṇavirocanaṃ na karoti. Na ñāyatīti na jānīyati. Na paññāyatīti nappaññāyate.

Kena littoti kena limpito. Palitto upalittoti upasaggena padaṃ vaḍḍhitaṃ. Ācikkhāhi niddesavasena. Desehi paṭiniddesavasena paññapehi tena tena pakārena. Atthaṃ bodhento paṭṭhapehi. Tassa tassatthassa kāraṇaṃ dassento vivarāhi. Byañjanabhāvaṃ dassento vibhajāhi. Nikkujjitabhāvaṃ gambhīrabhāvañca haritvā sotūnaṃ ñāṇassa patiṭṭhaṃ janayanto uttānīkarohi. Sabbehipi imehi ākārehi sotūnaṃ aññāṇandhakāraṃ vidhamento pakāsehīti evamattho daṭṭhabbo.

[2] Vevicchā pamādā nappakāsatīti macchariyahetu ca pamādahetu ca nappakāsati. Macchariyaṃ hissa dānādīhi guṇehi pakāsituṃ na deti, pamādo sīlādīhi. Jappābhilepananti taṇhā assa lokassa makkaṭalepo viya makkaṭassa abhilepanaṃ. Dukkhanti jātiādikaṃ dukkhaṃ.