อฏฺฐงฺคุเปตํ คิรมพฺภุทีรยิ
สีโห ยถา ปพฺพตมุทฺธนิฏฺฐิโต"ติ. เอวํ ตถา คโตติ ตถาคโต.
อถ วา ยถา ปุริมกา ภควนฺโต, อยมฺปิ ภควา เนกฺขมฺเมน กามจฺฉนฺทํ ฯเปฯ ปฐมชฺฌาเนน นีวรเณ ฯเปฯ อนิจฺจานุปสฺสนาย นิจฺจสญฺญํ ฯเปฯ อรหตฺตมคฺเคน สพฺพกิเลเส ปหาย คโต เอวมฺปิ ตถา คโตติ ตถาคโต. (๒)
กถํ ตถลกฺขณํ อาคโตติ ตถาคโต? ปฐวีธาตุยา กกฺขฬตฺตลกฺขณํ ตถํ อวิตถํ อาโปธาตุยา ปคฺฆรณลกฺขณํ เตโชธาตุยา อุณฺหตฺตลกฺขณํ, วาโยธาตุยา วิตฺถมฺภนลกฺขณํ, อากาสธาตุยา อสมฺผุฏฺฐลกฺขณํ, วิญฺญาณธาตุยา วิชานนลกฺขณํ.