ตตฺถ ปพฺพชิเตนาติ คิหิสํโยชนวตฺถุกามํ เฉตฺวา ปพฺพชิเตน. น เสวิตพฺพาติ น วลญฺเชตพฺพา. ปพฺพชิตานํเยว วิเสสโต ปฏิปตฺติยา ภาชนภูตตฺตา "ปพฺพชิเตน น เสวิตพฺพา"ติ วุตฺตํ. โย จายํ กาเมสุ กามสุขลฺลิกานุโยโคติ โย จ อยํ วตฺถุกาเมสุ กิเลสกามสุขสฺส, กิเลสกามสุขนิสฺสยสฺส วา อนุโยโค. หีโนติ ลามโก. คมฺโมติ คามวาสีนํ สนฺตโก. โปถุชฺชนิโกติ ปุถุชฺชเนน อนฺธพาลชเนน อาจิณฺโณ. อนริโยติ น อริโย. อถ วา น วิสุทฺธานํ อุตฺตมานํ อริยานํ สนฺตโก. อนตฺถสญฺหิโตติ น อตฺถสํหิโต, สุขาวหการณํ อนิสฺสิโตติ อตฺโถ. อตฺตกิลมถานุโยโคติ อตฺตโน กิลมถสฺส อนุโยโค, อตฺตโน ทุกฺขกรณนฺติ อตฺโถ. ทุกฺโขติ กณฺฏกาปสฺสยเสยฺยาทีหิ อตฺตมารเณหิ ทุกฺขาวโห. เตหิ ๑- ตปสฺสีหิ "อุตฺตมํ ตโป"ติ คหิตตฺตา เตสํ จิตฺตานุรกฺขนตฺถํ อิธ "หีโน"ติ น วุตฺตํ, ปพฺพชิตานํ ธมฺมตฺตา "คมฺโม"ติ จ, คิหีหิ อสาธารณตฺตา "โปถุชฺชนิโก"ติ จ น วุตฺตํ. ตตฺถ ปน