Idāni tesaṃ eva niddiṭṭhānaṃ dhammānaṃ "ye ye dhammā abhiññātā te te dhammā ñātā hontī"ti nigamanaṃ karoti, tassa abhimukhaṃ katvā ñātā hontīti adhippāyo. Taṃ ñātaṭṭhena ñāṇanti tesaṃ vuttappakārānaṃ dhammānaṃ jānanaṭṭhena ñāṇaṃ. Pajānanaṭṭhena paññāti pakārato jānanaṭṭhena paññā. Tena vuccatītiādito pucchitapucchā nigametvā dassitā. Tena kāraṇena "ime dhammā abhiññeyyāti sotāvadhānaṃ, taṃ pajānanā paññā sutamaye ñāṇan"ti vuccatīti atthoti.

Saddhammappakāsiniyā paṭisambhidāmaggaṭṭhakathāya

abhiññeyyaniddesavaṇṇanā niṭṭhitā.