maṃsaviññāṇañāṇesu taṇhādīsu ca dissati

dhārāyaṃ ariyamagge cittasantatiyampi ca.

"sotāyatanaṃ sotadhātu sotindriyan"tiādīsu hi ayaṃ sotasaddo maṃsasote dissati. "sotena saddaṃ sutvā"tiādīsu sotaviññāṇe. "dibbāya sotadhātuyā"ti- ādīsu ñāṇasote. "yāni sotāni lokasminti yāni etāni sotāni mayā kittitāni pakittitāni ācikkhitāni desitāni paññapitāni paṭṭhapitāni vivaritāni vibhattāni uttānīkatāni pakāsitāni. Seyyathidaṃ, taṇhāsoto diṭṭhisoto kilesasoto duccaritasoto avijjāsoto"tiādīsu taṇhādīsu pañcasu dhammesu. "addasā kho bhagavā mahantaṃ dārukkhandhaṃ gaṅgāya nadiyā sotena vuyhamānan"ti- ādīsu udakadhārāyaṃ. "ariyassetaṃ āvuso aṭṭhaṅgikassa maggassa adhivacanaṃ, yadidaṃ soto"tiādīsu ariyamagge. "purisassa ca viññāṇasotaṃ pajānāti ubhayato abbocchinnaṃ idha loke patiṭṭhitañca paraloke patiṭṭhitañcā"tiādīsu cittasantatiyaṃ. Idha panāyaṃ maṃsasote daṭṭhabbo. Tena sotena hetubhūtena, kāraṇabhūtena vā avadhīyati avatthāpīyati appīyatīti sotāvadhānaṃ. Kintaṃ? sutaṃ. Sutaṃ ca nāma "bahussuto hoti sutadharo sutasannicayo"tiādīsu viya sotadvārānusārena viññātaṃ avadhāritaṃ