@5 khu.khu. 25/12/11, khu.peta. 26/25/154 6 Ma.mū. 12/241/203

@7 Ma.mū. 12/333,339/297,301 8 abhi.ka. 37/1,12/1,12

@9 khu.khu. 25/13/8, khu.su. 25/8/379 10 dī.Sī. 9/169/54

Atha vā sutena pakato phassādiko dhammapuñjo sutamayo, tasmiṃ sutamaye dhammapuñje pavattaṃ taṃ sampayuttaṃ ñāṇaṃ sutamaye ñāṇaṃ. Sabhāvasāmaññalakkhaṇavasena dhamme jānātīti ñāṇaṃ. Taṃyeva ñāṇaṃ pariyāyavacanena adhippāyapakāsanatthaṃ aniyamena "paññā"ti vatvā pacchā adhippetaṃ "ñāṇan"ti niyametvā vuttanti veditabbaṃ. Ñāṇañca nāma sabhāvapaṭivedhalakkhaṇaṃ, akkhalitapaṭivedhalakkhaṇaṃ vā kusalissāsakhittausupaṭivedho viya, visayobhāsanarasaṃ padīpo viya, asammohapaccupaṭṭhānaṃ araññagatasudesako viya. "samāhito bhikkhave bhikkhu yathābhūtaṃ pajānātī"ti vacanato samādhipaṭṭhānaṃ. Lakkhaṇādīsu hi sabhāvo vā sāmaññaṃ vā lakkhaṇaṃ nāma, kiccaṃ vā sampatti vā raso nāma, paṭṭhānākāro vā phalaṃ vā paccupaṭṭhānaṃ nāma, āsannakāraṇaṃ padaṭṭhānaṃ nāmāti veditabbaṃ.