Ayaṃ panettha aṭṭhakathānayo "iti bhavadiṭṭhisannissitā vā"ti evaṃ sassatadiṭṭhiṃ vā sannissitā. Sassatadiṭṭhi hi ettha bhavadiṭṭhīti vuttā, ucchedadiṭṭhi ca vibhavadiṭṭhīti. Sabbadiṭṭhīnaṃ hi sassatucchedadiṭṭhīhi saṅgahitattā sabbepime diṭṭhigatikā sattā imāva dve diṭṭhiyo sannissitā honti. Vuttampi cetaṃ "dvayanissito khvāyaṃ kaccāna loko yebhuyyena atthitañceva natthitañcā"ti 2-. Ettha hi atthitāti sassataṃ natthitāti ucchedo. Ayaṃ tāva vaṭṭanissitānaṃ puthujjānānaṃ sattānaṃ āsayo. Idāni vivaṭṭanissitānaṃ suddhasattānaṃ āsayaṃ dassetuṃ "ete vā pana ubho ante anupagammā"tiādi vuttaṃ. Tattha "ete vā panā"ti eteyeva. "ubho ante"ti sassatucchedasaṅkhāte dve ante. "anupagammā"ti na allīyitvā. "idappaccayatāpaṭiccasamuppannesu dhammesū"ti idappaccayatāya ceva paṭiccasamuppannadhammesu ca. "anulomikā khantī"ti vipassanāñāṇaṃ. "yathābhūtaṃ ñāṇan"ti maggañāṇaṃ. Idaṃ vuttaṃ hoti:- "yā paṭiccasamuppāde ceva paṭiccasamuppannadhammesu ca ete ubho sassatucchedaante anupagantvā vipassanā paṭiladdhā, yañca tato uttariṃ maggañāṇaṃ, ayaṃ sattānaṃ āsayo. Ayaṃ vaṭṭanissitānañca vivaṭṭanissitānañca sabbesampi sattānaṃ āsayo idaṃ vasanaṭṭhānan"ti. Ayaṃ ācariyānaṃ samānaṭṭhakathā.

Vitaṇḍavādī panāha "maggo nāma vāsaṃ viddhaṃsento gacchati, tvaṃ maggo vāsoti vadesī"ti. So vattabbo "tvaṃ ariyavāsabhāṇako hosi na hosī"ti. Sace "na homī"ti vadati, "tvaṃ abhāṇakatāya na jānāsī"ti vattabbo. Sace "bhāṇakosmī"ti vadati, "suttaṃ āharā"ti vattabbo. Sace āharati, iccetaṃ kusalaṃ. No ce āharati, sayaṃ āharitabbaṃ "dasayime bhikkhave ariyavāsā, yadariyā āvasiṃsu vā āvasanti vā āvasissanti vā"ti etaṃ hi suttaṃ maggassa vāsabhāvaṃ dīpeti. Tasmā sukathitamevetanti. Imaṃ pana bhagavā sattānaṃ āsayaṃ jānanto imesañca diṭṭhigatānaṃ imesañca vipassanāñāṇamaggañāṇaṃ appavattakkhaṇepi jānāti eva. Tasmāyeva ca "kāmaṃ sevantaṃyeva jānātī"tiādi vuttanti.