[132] Idhekacco cakkhusamphassajaṃ vedanantiādīsu visuṃ visuṃ vedanāya diṭṭhiggahaṇe asatipi vedanāti ekaggahaṇena gahite sabbāsaṃ vedanānaṃ antagodhattā visuṃ visuṃ gahitā eva hontīti visuṃ visuṃ yojanā katāti veditabbā. So hi anubhavanavasena vedanāya oḷārikattā vedanaṃyeva "attā"ti gaṇhāti. Saññaṃ saṅkhāre viññāṇaṃ rūpaṃ attato samanupassatīti saññādayo arūpadhamme rūpañca ekato katvā "attā"ti samanupassati. Ummattako viya hi puthujjano yathā yathā upaṭṭhāti, tathā tathā gaṇhāti.

[133] Cakkhusamphassajaṃ saññantiādīsu sañjānanavasena saññāya pākaṭattā saññaṃ "attā"ti gaṇhāti. Sesaṃ vedanāya vuttanayena veditabbaṃ.

[134] Cakkhusamphassajaṃ cetanantiādīsu saṅkhārakkhandhapariyāpannesu dhammesu cetanāya padhānattā pākaṭattā ca cetanā eva niddiṭṭhā. Tāya itarepi niddiṭṭhāva honti. So pana cetasikabhāvavasena pākaṭattā cetanaṃ "attā"ti gaṇhāti. Sesaṃ vuttanayameva.

[135] Cakkhuviññāṇantiādīsu vijānanavasena cittassa pākaṭattā cittaṃ "attā"ti gaṇhāti. Sesametthāpi vuttanayameva.