๘. รัฐปาลเถราปทาน (๑๘)

|20.96| Padumuttarassa bhagavato lokajeṭṭhassa tādino varanāgo mayā dinno īsādanto uruḷhavo 1- . |20.97| Setacchattopasedhito 2- sāthabbaṇo 3- sahatthipo agghāpetvāna taṃ sabbaṃ saṅghārāmaṃ akārayiṃ. |20.98| Catupaññāsasahassāni pāsāde kārayiṃ ahaṃ mahoghadānaṃ karitvāna niyyādesiṃ mahesino. |20.99| Anumodi mahāvīro sayambhū aggapuggalo sabbe jane hāsayanto desesi amataṃ padaṃ. |20.100| Taṃ me buddho viyākāsi jaladuttamanāyako 4- bhikkhusaṅghe nisīditvā imā gāthā abhāsatha. |20.101| Catupaññāsasahassāni pāsāde kārayi ayaṃ kathayissāmi vipākaṃ suṇātha mama bhāsato. |20.102| Aṭṭhārasasahassāni kūṭāgārā bhavissare byamhuttamamhi nibbattā sabbasoṇṇamayā ca te. |20.103| Paññāsakkhattuṃ devindo devarajjaṃ karissati aṭṭhapaññāsakkhattuṃ ca cakkavatti bhavissati. |20.104| Kappasatasahassamhi okkākakulasambhavo gotamo nāma nāmena satthā loke bhavissati. @Footnote: 1 Ma. uruḷhavā. 2 Ma. setacchattopasodhito. Yu. .. pasevato. 3 Ma. sakappaṇo. @ 4 Po. jalajuttamanāmako. Ma. jaladuttaranāmako. |20.105| Devalokā cavitvāna sukkamūlena codito phīte 1- kule mahābhoge nibbattissati tāvade. |20.106| So pacchā pabbajitvāna sukkamūlena codito raṭṭhapāloti nāmena hessati satthusāvako. |20.107| Padhānaṃ pahitatto so upasanto nirūpadhi sabbāsave pariññāya nibbāyissatyanāsavo. |20.108| Uṭṭhāya abhinikkhamma jahitvā bhogasampadā kheḷapiṇḍeva bhogamhi pemaṃ mayhaṃ na vajjati. |20.109| Viriyaṃ me dhuradhorayhaṃ yogakkhemādhivāhanaṃ dhāremi antimaṃ dehaṃ sammāsambuddhasāsane. |20.110| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā raṭṭhapālo thero imā gāthāyo abhāsitthāti. Raṭṭhapālattherassa apadānaṃ samattaṃ.