๘. ปนสผลทายกเถราปทาน (๓๘๘)

[๓๙๐] |๓๙๐.๔๓| อชฺชุโน นาม สมฺพุทฺโธ หิมวนฺเต วสี ตทา จรเณน จ สมฺปนฺโน สมาธิกุสโล มุนิ ฯ |๓๙๐.๔๔| กุมฺภมตฺตํ คเหตฺวาน ปนสํ ชีวชีวกํ ฉตฺตปณฺเณ ฐเปตฺวาน อทาสึ สตฺถุโน อหํ ฯ |๓๙๐.๔๕| เอกนวุเต อิโต กปฺเป ยํ ผลํ อททึ ตทา ทุคฺคตึ นาภิชานามิ ผลทานสฺสิทํ ผลํ ฯ |๓๙๐.๔๖| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๓๙๐.๔๗| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๓๙๐.๔๘| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ปนสผลทายโก เถโร อิมา คาถาโย อภาสิตฺถาติ ฯ ปนสผลทายกตฺเถรสฺส อปทานํ สมตฺตํ ฯ