๔. คันโธทกทายกเถราปทาน (๕๔)

|๕๖.๒๕| ปทุมุตฺตรพุทฺธสฺส มหาโพธิมโห อหุ วิจิตฺตํ ฆฏมาทาย คนฺโธทกมทาสหํ ฯ |๕๖.๒๖| นฺหานกาเล จ โพธิยา มหาเมโฆ ปวสฺสถ นินฺนาโท จ มหา อาสิ อสนิยา ผลนฺติยา ฯ |๕๖.๒๗| เตนวาสนิเวเคน ตตฺถ กาลกโต อหํ เทวโลเก ฐิโต สนฺโต อิมา คาถา อภาสถ ฯ |๕๖.๒๘| อโห พุทฺโธ อโห ธมฺโม อโห โน สตฺถุสมฺปทา กเฬวรํ เม ปติตํ เทวโลเก รมามหํ ฯ |๕๖.๒๙| อุพฺพิทฺธํ ภวนํ มยฺหํ สตฺตภุมฺมํ สมุคฺคตํ กญฺญาสตสหสฺสานิ ปริวาเรนฺติ มํ สทา ฯ |๕๖.๓๐| อาพาธา เม น วิชฺชนฺติ โสโก มยฺหํ น วิชฺชติ ปริฬาหํ น ปสฺสามิ ปุญฺญกมฺมสฺสิทํ ผลํ ฯ |๕๖.๓๑| อฏฺฐวีเส กปฺปสเต ราชา สํวสิโต อหุ สตฺตรตนสมฺปนฺโน จกฺกวตฺติ มหพฺพโล ฯ |๕๖.๓๒| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา คนฺโธทกทายโก ๑- เถโร อิมา คาถาโย อภาสิตฺถาติ ฯ คนฺโธทกทายกตฺเถรสฺส อปทานํ สมตฺตํ ฯ @เชิงอรรถ: ๑ โป. ม. ยุ. คนฺโธทกิโย ฯ