อตีเต ปน วิปสฺสิสฺส ภควโต กาเล ปุนพฺพสุมิตฺโต นาม เสฏฺฐิ สุวณฺณิฏฺฐกาสนฺถาเรน กิณิตฺวา ตสฺมึเยว ฐาเน โยชนปฺปมาณํ สํฆารามํ กาเรสิ. สิขิสฺส ปน ภควโต กาเล สิริวฑฺโฒ นาม เสฏฺฐิ สุวณฺณผาลสนฺถาเรน กิณิตฺวา ตสฺมึเยว ฐาเน ติคาวุตปฺปมาณํ สํฆารามํ กาเรสิ. เวสฺสภุสฺส ภควโต กาเล โสตฺถิโย นาม เสฏฺฐิ สุวณฺณหตฺถิปทสนฺถาเรน กิณิตฺวา ตสฺมึเยว ฐาเน อฑฺฒโยชนปฺปมาณํ สํฆารามํ กาเรสิ. กกุสนฺธสฺส ภควโต กาเล อจฺจุโต นาม เสฏฺฐิ สุวณฺณิฏฺฐกาสนฺถาเรน กิณิตฺวา ตสฺมึเยว ฐาเน คาวุตปฺปมาณํ สํฆารามํ กาเรสิ. โกณาคมนสฺส ภควโต กาเล อุคฺโค นาม เสฏฺฐิ สุวณฺณกจฺฉปสนฺถาเรน กิณิตฺวา ฐาเน อฑฺฒคาวุตปฺปมาณํ สํฆารามํ กาเรสิ. กสฺสปสฺส ภควโต กาเล สุมงฺคโล นาม เสฏฺฐิ สุวณฺณยฏฺฐิสนฺถาเรน กิณิตฺวา ตสฺมึเยว ฐาเน โสฬสกรีสปฺปมาณํ สํฆารามํ กาเรสิ. อมฺหากํ ปน ภควโต กาเล อนาถปิณฺฑิโก นาม เสฏฺฐิ กหาปณโกฏิสนฺถาเรน กิณิตฺวา ตสฺมึเยว ฐาเน อฏฺฐกรีสปฺปมาณํ สํฆารามํ กาเรสิ. อิทํ กิร ฐานํ สพฺพพุทฺธานํ อวิชหิตฏฺฐานเมว.

อิติ มหาโพธิมณฺเฑ สพฺพญฺญุตปฺปตฺติโต ยาว มหาปรินิพฺพานมญฺจา ยสฺมึ ยสฺมึ ฐาเน ภควา วิหาสิ. อิทํ สนฺติเกนิทานํ นามาติ เวทิตพฺพํ.

นิทานกถา นิฏฺฐิตา.

เถราปทาน