[๑๘] ปาวุราติ ปาวุรณา, กีทิสา? กมฺพลา โลมสุตฺเตหิ กตา, ทุกูลา ทุกูลปเฏหิ กตา, จีนา จีนปเฏหิ กตา, ปตฺตุณฺณา ปตฺตุณฺณเทเส ชาตปเฏหิ กตา, ปณฺฑุ ปณฺฑุวณฺณา วิจิตฺตตฺถรณํ อเนเกหิ อตฺถรเณหิ ปาวุรเณหิ จ วิจิตฺตํ สพฺพํ สยนํ มนสา จิตฺเตน อหํ ปญฺญเปสินฺติ อตฺโถ.

[๑๙] ตเทว ปาสาทํ วณฺเณนฺโต "ตาสุ ตาเสฺวว ภูมีสู"ติอาทิมาห. ตตฺถ รตนกูฏลงฺกตนฺติ รตนมยกูเฏหิ รตนกณฺณิกาหิ อลงฺกตํ โสภิตนฺติ อตฺโถ. มณิเวโรจนา อุกฺกาติ เวโรจนมณีหิ รตฺตมณีหิ กตา อุกฺกา ทณฺฑปทีปา. ธารยนฺตา สุติฏฺฐเรติ อากาเส สุฏฺฐุ ธารยนฺตา คณฺหนฺตา อเนกสตชนา สุฏฺฐุ ติฏฺฐนฺตีติ อตฺโถ.

@ ๓ สี. ตตถ ยํ น ปาสาเท ตํ น พหู, อิ. ตตฺถ ยํ นํ ปาสาทํ นานา พาหูติ.