[๓๔] ตทา มม ปาสาเท สนฺนิปติตา สาวกาปิ พุทฺเธ ปญฺหํ ปุจฺฉนฺติ, พุทฺธา สาวเก สิสฺเส ปญฺหํ ปุจฺฉนฺติ, เต พุทฺธา จ สาวกา จ อญฺญมญฺญํ ปญฺหํ ปุจฺฉิตฺวา อญฺญมญฺญํ พฺยากโรนฺติ วิสฺสชฺเชนฺติ.
[๓๕] ปุน เต สพฺเพ เอกโต ทสฺเสนฺโต "พุทฺธา ปจฺเจกพุทฺธา จา"ติอาทิมาห. ตตฺถ พุทฺธา สมฺมาสมฺพุทฺธา ปจฺเจกพุทฺธา จ สาวกา จ สิสฺสา ปริจารกา นิสฺสิตกา เอเต สพฺเพ สกาย สกาย รติยา รมมานา สลฺลีนา ๒- มม ปาสาเท อภิรมนฺตีติ อตฺโถ.
[๓๖] เอวํ ตสฺมึ เวชยนฺตปาสาเท ปจฺเจกพุทฺธานํ อาจารสมฺปตฺตึ ทสฺเสตฺวา อิทานิ อตฺตโน อานุภาวํ ทสฺเสนฺโต โส ติโลกวิชโย จกฺกวตฺติราชา "ฉตฺตา ติฏฺฐนฺตุ รตนา"ติอาทิมาห. ตตฺถ รตนา สตฺตรตนมยา ฉตฺตา กญฺจนาเวฬปนฺติกา สุวณฺณชาเลหิ โอลมฺพิตา ติฏฺฐนฺตุ. มุตฺตาชาลปริกฺขิตฺตา มุตฺตาชาเลหิ ปริวาริตา สพฺเพ ฉตฺตา มม มตฺถเก มุทฺธนิ ธาเรนฺตูติ จินฺติตมตฺเตเยว ฉตฺตา ปาตุภูตา โหนฺตีติ อตฺโถ.