[๕๔] สุกเตน เตน กมฺเมน สทฺทหิตฺวา กเตน กุสลกมฺเมน เจตนาปณิธีหิ จ จิตฺเตน กตปตฺถนาหิ จ มานุสํ เทหํ มนุสฺสสรีรํ ชหิตฺวา ฉฑฺเฑตฺวา อหํ ตาวตึสํ เทวโลกํ อคจฺฉึ อคมาสึ, สุตฺตปฺปพุทฺโธ วิย ตตฺถ อุปฺปชฺชินฺติ อตฺโถ.

[๕๕] ตโต ติโลกวิชโย จกฺกวตฺติราชา กาลงฺกโต, ตโต ปฏฺฐาย อาคเต ทุเว ภเว เทฺว ชาติโย ปชานามิ เทวตฺเต เทวตฺตภาเว มานุเส มนุสฺสตฺตภาเว จ, ตโต ชาติทฺวยโต อญฺญํ คตึ อญฺญํ อุปฺปตฺตึ น ชานามิ น ปสฺสามิ, ๑- มนสา จิตฺเตน ปตฺถนาผลํ ปตฺถิตปตฺถนาผลนฺติ อตฺโถ.

[๕๖] เทวานํ อธิโก โหมีติ ยทิ เทเวสุ ชาโต, อายุวณฺณพลเตเชหิ เทวานํ อธิโก เชฏฺโฐ เสฏฺโฐ อโหสินฺติ อตฺโถ. ยทิ มนุสฺเสสุ ชาโต.