ปาฐีนมจฺฉา จ ปาวุสา มจฺฉา จ พลชมจฺฉา มุญฺชมจฺฉา โรหิตมจฺฉา จ วคฺคฬมจฺฉา จ เอเต สพฺเพ มจฺฉชาติกา อิโต จิโต จ ปปตายนฺตา นทิยา สทฺธึ ปวตฺตนฺตา มม อสฺสมปทํ โสภยนฺตีติ อตฺโถ.

[๑๔๖] อุโภ กูเลสุ นทิยา ปุปฺผิโน ผลิโน ทุมา

อุภโต อภิลมฺพนฺตา โสภยนฺติ มมสฺสมํ.

ตตฺถ อุโภ กูเลสูติ ตสฺสา นทิยา อุโภสุ ปสฺเสสุ ธุวปุปฺผิโน ธุวผลิโน รุกฺขา อุภโต อภิลมฺพนฺตา นทิยา อุโภ ตีเร เหฏฺฐา โอนมนฺตา มม อสฺสมํ โสภยนฺตีติ อตฺโถ.