ตตฺถ มม อสฺสมสมีเป สรํ นิสฺสาย ปาเรวตา ปกฺขี จ รวิหํสา ปกฺขี จ นทีจรา จกฺกวากปกฺขี จ โกกิลา ปกฺขี จ สุกปกฺขี จ สาฬิกาปกฺขี จ ตํ สรํ อุปนิสฺสาย ชีวนฺตีติ สมฺพนฺโธ.

[๑๖๑] กุกุตฺถกา กุฬีรกา วเน โปกฺขรสาตกา

ทินฺทิภา สุวโปตา จ อุปชีวนฺติ ตํ สรํ.

ตตฺถ กุกุตฺถกาติ เอวํ นามิกา ปกฺขี จ. กุฬีรกาติ เอวํ นามิกา ปกฺขี จ. วเน โปกฺขรสาตกา ปกฺขี จ ทินฺทิภา ปกฺขี จ สุวโปตา ปกฺขี จ เอเต สพฺเพ ปกฺขิโน ตํ มม อสฺสมสมีเป สรํ นิสฺสาย ชีวนฺตีติ สมฺพนฺโธ.