[๑๙๔] ปุน เตสเมวานุภาวํ ปกาเสนฺโต ปฐวีกมฺปกา เอเตติอาทิมาห. ตทา เอเต สพฺพตฺถ อิจฺฉาจารา ปฐวีกมฺปกา เมทนีสญฺจลนชาติกา นภจาริโน อากาสจาริโน. อุคฺคเตชาติ อุคฺคตเตชา ปตฺถฏเตชา ทุปฺปสหา ปสยฺห อภิภวิตฺวา ปวตฺติตุํ อสกฺกุเณยฺยาติ ทุปฺปสหา. สาคโรว อโขภิยาติ อญฺเญหิ อโขภิโย อนาลุฬิโต สาคโร อิว สมุทฺโท วิย อญฺเญหิ อโขภิยา กมฺเปตุํ อสกฺกุเณยฺยา โหนฺตีติ สมฺพนฺโธ.
[๑๙๕] ฐานจงฺกมิโน เกจีติ เตสํ มม สิสฺสานํ อนฺตเร เอกจฺเจ อิสโย ฐานิริยาปถจงฺกมนิริยาปถสมฺปนฺนา เอกจฺเจ อิสโย เนสชฺชิกา นิสชฺชิริยาปถสมฺปนฺนา เอกจฺเจ อิสโย ปวตฺตโภชนา สยํปติตปณฺณาหารา เอวรูเปหิ คุเณหิ ยุตฺตตฺตา ทุราสทาติ สมฺพนฺโธ.
[๑๙๖] เต สพฺเพ โถเมนฺโต เมตฺตาวิหาริโนติอาทิมาห. ตตฺถ "อปริมาเณสุ จกฺกวาเฬสุ อปริมาณา สตฺตา สุขี โหนฺตู"ติอาทินา สิเนหลกฺขณาย เมตฺตาย ผริตฺวา วิหรนฺติ, อตฺตภาวํ ปวตฺเตนฺตีติ เมตฺตาวิหาริโน เอเต มม สิสฺสาติ อตฺโถ. สพฺเพ เต อิสโย สพฺพปาณินํ สพฺเพสํ สตฺตานํ หิเตสี หิตคเวสกา. อนตฺตุกฺกํสกา อตฺตานํ น อุกฺกํสกา อมานิโน กสฺสจิ กญฺจิ ปุคฺคลํ น วมฺเภนฺติ นีจํ กตฺวา น มญฺญนฺตีติ อตฺโถ.
[๑๙๗] เต มม สิสฺสา สีลสมาธิสมาปตฺติคุณยุตฺตตฺตา สีหราชา อิว อฉมฺภีตา นิพฺภยา คชราชา อิว หตฺถิราชา วิย ถามวา สรีรพลฌานพลสมฺปนฺนา พฺยคฺฆราชา อิว ทุราสทา ฆฏฺเฏตุมสกฺกุเณยฺยา มม สนฺติเก อาคจฺฉนฺตีติ สมฺพนฺโธ.