[๒๐๙] อชฺโฌคาเหตฺวา หิมวนฺตนฺติ หิมวนฺตสมีปํ โอคาเหตฺวา ปวิสิตฺวาติ อตฺโถ. เสสํ อุตฺตานตฺถเมว.
[๒๑๐-๑] ชลิตํ ชลมานํ อินฺทีวรปุปฺผํ อิว หุตาสนํ โหมสฺส อาสนํ อาทิตฺตํ อาภายุตํ อคฺคิกฺขนฺธํ อิว คคเน อากาเส โชตมานํ วิชฺชุ อิว สุฏฺฐุ ผุลฺลํ สาลราชํ อิว นิสินฺนํ โลกนายกํ อทฺทสนฺติ สมฺพนฺโธ.
[๒๑๓] เทวานํ เทโว เทวเทโว, ตํ เทวเทวํ ทิสฺวาน ตสฺส ลกฺขณํ ทฺวตฺตึสมหาปุริสลกฺขณสญฺชานนการณํ. "พุทฺโธ นุ โข น วา พุทฺโธ"ติ อุปธารยึ วิจาเรสึ. จกฺขุมํ ปญฺจหิ จกฺขูหิ จกฺขุมนฺตํ ชินํ เกน การเณน ปสฺสามีติ สมฺพนฺโธ.
[๒๑๔] จรณุตฺตเม อุตฺตมปาทตเล สหสฺสารานิ จกฺกลกฺขณานิ ทิสฺสนฺติ, อหํ ตสฺส ภควโต ตานิ ลกฺขณานิ ทิสฺวา ตถาคเต นิฏฺฐํ คจฺฉึ สนฺนิฏฺฐานํ อคมาสึ, นิสฺสนฺเทโห อาสินฺติ อตฺโถ. เสสํ อุตฺตานตฺถเมว.