[๒๑๘] สยมฺภู สยเมว ภูตา. อมิโตทย อมิตานํ อปริมาณานํ คุณานํ อุทย อุฏฺฐานฏฺฐาน, อิทํ ปททฺวยํ อาลปนเมว. อิมํ โลกํ อิมํ สตฺตโลกํ สํ สุฏฺฐุ อุทฺธรสิ สํสารโต อุทฺธริตฺวา นิพฺพานถลํ ปาเปสีติ อตฺโถ. เต สพฺเพ สตฺตา ตว ทสฺสนํ อาคมฺม อาคนฺตฺวา กงฺขาโสตํ วิจิกิจฺฉามโหฆํ ตรนฺติ อติกฺกมนฺตีติ สมฺพนฺโธ.

[๒๑๙] ภควนฺตํ โถเมนฺโต ตาปโส ตุวํ สตฺถาติอาทิมาห. ตตฺถ ภนฺเต สพฺพญฺญุ ตุวํ สเทวกสฺส โลกสฺส สตฺถา อาจริโย อุตฺตมฏฺเฐน ตฺวเมว เกตุ อุจฺโจ, สกลโลเก ปกาสนฏฺเฐน ตฺวเมว ธโช, โลกตฺตเย อุคฺคตตฺตา ตฺวเมว ยูโป อุสฺสาปิตถมฺภสทิโส, ปาณินํ สพฺพสตฺตานํ ตฺวเมว ปรายโน อุตฺตมคมนียฏฺฐานํ ๑- ตฺวเมว ปติฏฺฐา ปติฏฺฐฏฺฐานํ โลกสฺส โมหนฺธการวิธมนโต ตฺวเมว ทีโป เตลปทีโป วิย ทฺวิปทุตฺตโม ทฺวิปทานํ เทวพฺรหฺมมนุสฺสานํ อุตฺตโม เสฏฺโฐติ สมฺพนฺโธ.

[๒๒๐] ปุน ภควนฺตํเยว โถเมนฺโต สกฺกา สมุทฺเท อุทกนฺติอาทิมาห. ตตฺถ จตุราสีติโยชนสหสฺสคมฺภีเร สมุทฺเท อุทกํ อาฬฺหเกน ปเมตุํ มินิตุํ สกฺกา ภเวยฺย, ภนฺเต สพฺพญฺญุ ตว ญาณํ "เอตฺตกํ ปมาณนฺ"ติ ปเมตเว มินิตุํ น เตฺวว สกฺกาติ อตฺโถ.