[๒๒๑] ตุลมณฺฑเล ตุลปญฺชเร ฐเปตฺวา ปฐวึ เมทนึ ธาเรตุํ สกฺกา, ภนฺเต สพฺพญฺญุ ตว ญาณํ ธาเรตุํ น ตุ เอว สกฺกาติ สมฺพนฺโธ.
[๒๒๒] ภนฺเต สพฺพญฺญุ อากาโส ๑- สกลนฺตลิกฺขํ รชฺชุยา วา องฺคุเลน วา มินิตุํ สกฺกา ภเวยฺย, ตว ปน ญาณํ ญาณากาสํ น ตุ เอว ปเมตเว มินิตุํ สกฺกาติ อตฺโถ.
[๒๒๓] มหาสมุทฺเท อุทกนฺติ จตุราสีติโยชนสหสฺสคมฺภีเร สาคเร อขิลํ อุทกญฺจ, จตุนหุตาธิกทฺวิโยชนสตสหสฺสพหลํ อขิลํ ปฐวิญฺจ ชเห ชเหยฺย อติกฺกเมยฺย สมํ กเรยฺย พุทฺธสฺส ญาณํ อุปาทาย คเหตฺวา ตุเลยฺย สมํ กเรยฺย. อุปมาโต อุปมาวเสน น ยุชฺชเร น โยเชยฺยุํ. ๒- ญาณเมว อธิกนฺติ อตฺโถ.
[๒๒๔] จกฺขุม ปญฺจหิ จกฺขูหิ จกฺขุมนฺต, อาลปนเมตํ. สห เทเวหิ ปวตฺตสฺส โลกสฺส, ภุมฺมตฺเถ สามิวจนํ. สเทวเก โลกสฺมึ อนฺตเร เยสํ ยตฺตกานํ สตฺตานํ จิตฺตํ ปวตฺตติ. เอเต ตตฺตกา สจิตฺตกา สตฺตา ตว ญาณมฺหิ อนฺโตชาลคตา ญาณชาลสฺมึ อนฺโต ปวิฏฺฐาติ สมฺพนฺโธ, ญาณชาเลน สพฺพสตฺเต ปสฺสสีติ อตฺโถ.