อนาถปิณฺฑิโก "กึ ภนฺเต อติทิวา อาคตตฺถา"ติ อาห. โมคฺคลฺลานสฺส จ นนฺโทปนนฺทสฺส จ สงฺคาโม อโหสีติ. กสฺส ปน ภนฺเต ชโย, กสฺส ปราชโยติ. โมคฺคลฺลานสฺส ชโย, นนฺทสฺส ปราชโยติ. อนาถปิณฺฑิโก "อธิวาเสตุ เม ภนฺเต ภควา สตฺตาหํ เอกปฏิปาฏิยา ภตฺตํ สตฺตาหํ เถรสฺส สกฺการํ กริสฺสามี"ติ วตฺวา สตฺตาหํ พุทฺธปฺปมุขานํ ปญฺจนฺนํ ภิกฺขุสตานํ มหาสกฺการํ อกาสิ. เตน วุตฺตํ "นนฺโทปนนฺททมเนน ทีเปตพฺโพ"ติ.

เอกสฺมึ หิ สมเย ปุพฺพาราเม วิสาขาย มหาอุปาสิกาย การิตสหสฺสคพฺภปฏิมณฺฑิเต ปาสาเท ภควติ วิหรนฺเต ฯเปฯ สํเวเชสิ จ เทวตาติ. เตน วุตฺตํ:-

"ธรณิมฺปิ สุคมฺภีรํ พหลํ ทุปฺปธํสิยํ

วามงฺคุฏฺเฐน โขเภยฺยํ อิทฺธิยา ปารมึ คโต"ติ.