susuddhapulinākiṇṇā avidūre mamassamaṃ.

Tattha uttānakūlāti agambhīrā nadī. Supatitthāti sundarapatitthā. Manoramāti manallīnā manāpā. Susuddhapulinākiṇṇāti suṭṭhu dhavalamuttādala sadisavālukākiṇṇā gahanībhūtāti attho. Sā itthambhūtā nadikā kunnadī mamassamaṃ mayhaṃ assamassa avidūre samīpe ahosīti attho. "assaman"ti ca sattamyatthe upayogavacananti veditabbaṃ.

[143] Asakkharā apabbhārā sādu appaṭigandhikā

sandatī nadikā tattha sobhayantā mamassamaṃ.