[400] Ñātimitte samānetvāti mama bandhusahāye samānetvā rāsiṃ katvā. Mahāvīro bhagavā parinibbuto adassanaṃ agamāsīti idaṃ vacanaṃ abraviṃ kathesinti sambandho. Handa pūjaṃ karomaseti handāti vossaggatthe nipāto, tena kāraṇena mayaṃ sabbe samāgatā pūjaṃ karomāti attho seti nipāto.

[401] Sādhūti te paṭissutvāti te mama ñātimittā sādhu iti sunadaraṃ bhaddakaṃ iti paṭisuṇitvā mama vacanaṃ sampaṭicchitvā me mayhaṃ bhiyyo atirekaṃ hāsaṃ pīti janiṃsu uppādesunti attho. (4)- Tato attano katapuññasañcayaṃ dassento buddhasmiṃ lokanāthamhītiādimāha.

[402] Satahatthaṃ uggataṃ ubbiddhaṃ diyaḍḍhahatthasataṃ vitthataṃ vimānaṃ nabhasi ākāse uggataṃ agghiyaṃ sukataṃ sundarākārena kataṃ katvā kāretvā ca puññasañcayaṃ puññarāsiṃ kāhāsiṃ akāsinti sambandho.

[403] Katvāna agghiyaṃ tatthāti tasmiṃ cetiyapūjanaṭṭhāne tālapantīhi tālapālīhi cittitaṃ sobhitaṃ agghiyaṃ katvāna kāretvā ca sakaṃ cittaṃ attano cittaṃ pasādetvā cetiyaṃ pūjayuttamanti uttamaṃ buddhadhātunidhāpitaṃ cetiyaṃ pūjayinti sambandho.