[616] Catuddisaṃ namassitvāti catūsu disāsu namassitvā sakaṃ cittaṃ attano cittaṃ pasādetvā ādarena patiṭṭhāpetvā sīhanādaṃ abhītanādaṃ anadiṃ ghosesinti attho.

[617] Tato buddhena dinnabyākaraṇaṃ pakāsento padumuttarotiādimāha. Taṃ uttānatthameva.

[618] Vadataṃ seṭṭhoti "mayaṃ buddhā, mayaṃ buddhā"ti vadantānaṃ aññatitthiyānaṃ seṭṭho uttamo buddho āgatoti sambandho. Tassa āgatassa bhagavato taṃ dhammaṃ sossāma suṇissāmāti attho.