[625] Padhānapahitattoti vīriyakaraṇatthaṃ pesitacitto. Upadhisaṅkhātānaṃ kilesānaṃ abhāvena nirupadhi. Kilesadarathānaṃ abhāvena upasanto. Sabbāsave sakalāsave pariññāya pahāya anāsavo nikkileso nibbāyissati khandhaparinibbānena nibbuto bhavissatīti attho.

[626] Vijane pantaseyyamhīti janasambādharahite dūrāraññasenāsaneti attho. Vāḷamigasamākuleti kāḷasīhādīhi khaṇḍamigasaṅgehi ākule saṅkiṇṇeti attho. Sesaṃ vuttatthamevāti.

Piṇḍolabhāradvājattherāpadānavaṇṇanā niṭṭhitā.