@6 cha.Ma. evaṃ. 7 khu.dha. 25/133/40. Imañca pana tassa therassa mātugāmena saddhiṃ vicaraṇabhāvaṃ kosalaraññopi kathayiṃsu. Rājā "gacchatha bhaṇe, naṃ vīmaṃsathā"ti pesetvā sayampi mandeneva parivārena saddhiṃ therassa santikaṃ gantvā ekamantaṃ olokento aṭṭhāsi. Tasmiṃ khaṇe thero sūcikammaṃ karonto nisinno hoti. Sāpissa itthī avidūraṭṭhāne ṭhitā viya paññāyati.

Rājā taṃ disvā "atthi taṃ kāraṇan"ti tassā ṭhitaṭṭhānaṃ agamāsi. Sā tasmiṃ āgacchante therassa vasanapaṇṇasālaṃ paviṭṭhā viya ahosi, rājāpi tāya saddhiṃ eva paṇṇasālameva pavisitvā sabbattha olokento adisvā "nāyaṃ mātugāmo, therassa eko kammavipāko"ti saññaṃ katvā paṭhamaṃ therassa samīpena gacchantopi theraṃ avanditvā tassa kāraṇassa abbhūtabhāvaṃ ñatvā paṇṇasālato nikkhamitvā theraṃ vanditvā ekamantaṃ nisinno "kacci bhante piṇḍapātena na kilamathā"ti pucchi. Thero "vaṭṭati mahārājā"ti āha. "jānāmahaṃ bhante ayyassa kathaṃ, evarūpena upakilesena saddhiṃ carantānaṃ tumhākaṃ ke nāma pasīdissanti, ito paṭṭhāya te katthaci gamanakiccaṃ natthi. Ahaṃ catūhi paccayehi upaṭṭhahissāmi, tumhe yonisomanasikāre mā pamajjitthā"ti vatvā nibaddhabhikkhaṃ paṭṭhapesi. Thero rājānaṃ upatthambhakaṃ labhitvā bhojanasappāyena ekaggacitto hutvā vipassanaṃ vaḍḍhetvā arahattaṃ pāpuṇi. Tato paṭṭhāya sā itthī antaradhāyi.

Tadā mahāsubhaddā ugganagare micchādiṭṭhikakule vasamānā "satthā maṃ anukampatū"ti uposathaṃ adhiṭṭhāya nirāmagandhā hutvā uparipāsādatale ṭhitā "imāni pupphāni antare aṭṭhatvā dasabalassa matthake vitānaṃ hutvā tiṭṭhantu,