So tena puññakammena aparāparaṃ sugatīsuyeva parivattetvā kassapassa dasabalassa kāle bārāṇasiyaṃ kulaghare nibbattitvā parinibbute bhagavati suvaṇṇacetiyakaraṇaṭṭhānaṃ satasahassagghanikāya suvaṇṇiṭṭhakāya pūjaṃ katvā "bhagavā mayhaṃ etassa nissandena nibbattanibbattaṭṭhāne sarīraṃ suvaṇṇavaṇṇaṃ hotū"ti patthanaṃ akāsi. Tato yāvajīvaṃ kusalakammaṃ katvā ekabuddhantaraṃ devamanussesu saṃsaritvā imasmiṃ buddhuppāde ujjeniyaṃ rañño caṇḍapajjotassa purohitassa gehe nibbatti, tassa nāmaggahaṇadivase mātāpitaro "amhākaṃ putto suvaṇṇavaṇṇo attano nāmaṃ gahetvā āgato"ti kañcanamāṇavotveva nāmaṃ kariṃsu. So vuddhimanvāya tayo vede uggaṇhitvā pitu accayena purohitaṭṭhānaṃ labhi. So gottavasena kaccānoti paññāyittha.

Rājā caṇḍapajjoto buddhuppādaṃ sutvā "ācariya tvaṃ tattha gantvā satthāraṃ idhānehī"ti pesesi. So attaṭṭhamo satthu santikaṃ upagato. Tassa satthā dhammaṃ desesi. Desanāpariyosāne so sattahi janehi saddhiṃ saha paṭisambhidāhi arahatte patiṭṭhāsi. Atha satthā "etha bhikkhavo"ti hatthaṃ pasāresi. Te tāvadeva dvaṅgulamattakesamassukā iddhimayapattacīvaradharā vassasatikattherā viya ahesuṃ. Evaṃ thero sadatthaṃ nipphādetvā "bhante rājā caṇḍapajjoto tumhākaṃ

@4 cha.Ma. etassa nissandenāti na dissati. 5 cha.Ma. vassasaṭṭhikattheRā. Pāde vandituṃ dhammañca sotuṃ icchatī"ti satthu ārocesi. Satthā "tvaṃyeva bhikkhu tattha gaccha, tayi gatepi rājā pasīdissatī"ti āha. Thero attaṭṭhamo tattha gantvā rājānaṃ pasādetvā avantīsu sāsanaṃ patiṭṭhāpetvā puna satthu santikameva gato.