[31] Evaṃ so pattaarahattaphalo "etadaggaṃ bhikkhave mama sāvakānaṃ bhikkhūnaṃ saṅkhittena bhāsitassa vitthārena atthaṃ vibhajantānaṃ yadidaṃ mahākaccāyano"ti etadaggaṭṭhānaṃ patvā attano pubbakammaṃ saritvā pubbacaritāpadānaṃ pakāsento padumuttaranāthassātyādimāha. Tattha padumaṃ nāma cetiyanti padumehi chāditattā vā padumākārehi katattā vā bhagavato vasanagandhakuṭivihārova pūjanīyabhāvena cetiyaṃ, yathā "gotamakacetiyaṃ, āḷavakacetiyan"ti vutte tesaṃ yakkhānaṃ nivāsanaṭṭhānaṃ pūjanīyaṭṭhānattā cetiyanti vuccati, evamidaṃ bhagavato vasanaṭṭhānaṃ cetiyanti vuccati, na dhātunidhāyakacetiyanti veditabbaṃ. Na hi aparinibbutassa bhagavato sarīradhātūnaṃ abhāvā dhātucetiyaṃ akari. Silāpaṭaṃ kārayitvāti tassā padumanāmikāya gandhakuṭiyā pupphādhāratthāya heṭṭhā phalikamayaṃ silāpaṭaṃ kāretvā. Suvaṇṇenābhilepayinti taṃ silāpaṭaṃ jambonadasuvaṇṇena abhivisesena lepayiṃ chādesinti attho.

[32] Ratanāmayaṃ sattahi ratanehi kataṃ chattaṃ paggayha muddhani dhāretvā vāḷavījaniñca setapavaracāmarīvījaniṃ paggayha buddhassa abhiropayiṃ. Lokabandhussa tādinoti sakalalokabandhusadisassa tādiguṇasamaṅgino buddhassa dhāresinti attho. Sesaṃ uttānatthamevāti.

Mahākaccānattherāpadānavaṇṇanā niṭṭhitā.