[๓๔] |๓๔.๑๗| โสภิโต นาม นาเมน อโหสึ พฺราหฺมโณ ตทา ปุรกฺขโต สสิสฺเสหิ อารามํ อคมาสหํ ฯ |๓๔.๑๘| ภควา ตมฺหิ สมเย ภิกฺขุสงฺฆปุรกฺขโต อารามทฺวารา นิกฺขมฺม อฏฺฐาสิ ปุริสุตฺตโม ฯ |๓๔.๑๙| ตมทฺทสาสึ สมฺพุทฺธํ ทนฺตํ ทนฺตปุรกฺขตํ สกํ จิตฺตํ ปสาเทตฺวา สนฺถวึ โลกนายกํ ฯ |๓๔.๒๐| เยเกจิ ปาทปา สพฺเพ มหิยา เต วิรูหเร พุทฺธิมนฺโต ตถา สตฺตา รุหนฺติ ชินสาสเน ฯ |๓๔.๒๑| สตฺถวาโหปิ สพฺพญฺญู มเหสี พหุเก ชเน วิปถา อุทฺธริตฺวาน ปถํ อาจิกฺขเส ตุวํ ฯ |๓๔.๒๒| ทนฺโต ทนฺตปุรกฺขโต ๑- ฌายี ฌานรเตหิ จ อาตาปิปหิตตฺเตหิ อุปสนฺเตหิ ตาทิภิ ฯ |๓๔.๒๓| อลงฺกโต ปริสโต ๒- ปุญฺญญาเณหิ ๓- โสภสิ ปภา นิทฺธาวเต ตุยฺหํ สุริโยทยโน ยถา ฯ |๓๔.๒๔| ปสนฺนจิตฺตํ ทิสฺวาน มเหสี ปทุมุตฺตโร ภิกฺขุสงฺเฆ ฐิโต สตฺถา อิมา คาถา อภาสถ ฯ |๓๔.๒๕| โย โส หาสํ ชเนตฺวาน มมํ กิตฺเตสิ พฺราหฺมโณ กปฺปานํ สตสหสฺสํ เทวโลเก รมิสฺสติ ฯ |๓๔.๒๖| ตุสิตาหิ จวิตฺวาน สุกฺกมูเลน โจทิโต โคตมสฺส ภควโต สาสเน ปพฺพชิสฺสติ ฯ |๓๔.๒๗| ตุฏฺฐหฏฺฐํ ลภิสฺสติ ๔- ปพฺพชิตฺวาน สาสเน สาคโต นาม นาเมน เหสฺสติ สตฺถุ สาวโก ฯ |๓๔.๒๘| ปพฺพชิตฺวาน กาเยน ปาปกมฺมํ วิวชฺชยึ วจีทุจฺจริตํ หิตฺวา อาชีวํ ปริโสธยึ ฯ |๓๔.๒๙| เอวํ วิหารมาโนหํ เตโชธาตูสุ โกวิโท สพฺพาสเว ปริญฺญาย วิหรามิ อนาสโว ฯ @เชิงอรรถ: ๑ ม. ยุ. ทนฺตปริกิณฺโณ ฯ ๒ ม. อลงฺกโต ปริสาหิ ฯ ๓ ยุ. สหคเณหิ ฯ ๔ ม. เตน @กมฺเมน สุกเตน อรหตฺตํ ลภิสฺสติ ฯ ยุ. วิมฺภกปสุโต หุตฺวา อรหตฺตํ ลภิสฺสติ ฯ |๓๔.๓๐| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา สาคโต เถโร อิมา คาถาโย อภาสิตฺถาติ ฯ สาคตตฺเถรสฺส อปทานํ สมตฺตํ ฯ