[๒๒๑] |๒๒๑.๔๔| นิสินฺโน ปาสาทวเร นารีคณปุรกฺขโต พฺยาธิตํ สมณํ ทิสฺวา อตินาเมสหํ ฆรํ ฯ |๒๒๑.๔๕| อุปวิฏฺฐํ มหาวีรํ เทวเทวํ นราสภํ สปฺปิเตลํ มยา ทินฺนํ สิทฺธตฺถสฺส มเหสิโน ฯ |๒๒๑.๔๖| ปสฺสทฺธทรถํ ทิสฺวา วิปฺปสนฺนมุขินฺทฺริยํ วนฺทิตฺวา สตฺถุโน ปาเท อนุสํสาวยึ ปุเร ฯ |๒๒๑.๔๗| ทิสฺวา มํ สุปสนฺนนฺตํ อิทฺธิยา ปารมึ คโต นภํ อพฺภุคฺคมิ วีโร หํสราชาว อมฺพเร ฯ |๒๒๑.๔๘| จตุนวุเต อิโต กปฺเป ยํ ทานมททึ ตทา ทุคฺคตึ นาภิชานามิ สปฺปิเตลสฺสิทํ ผลํ ฯ |๒๒๑.๔๙| อิโต สตฺตรเส กปฺเป ทุติเทวสนามโก สตฺตรตนสมฺปนฺโน จกฺกวตฺติ มหพฺพโล ฯ |๒๒๑.๕๐| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา สปฺปิทายโก เถโร อิมา คาถาโย อภาสิตฺถาติ ฯ สปฺปิทายกตฺเถรสฺส อปทานํ สมตฺตํ ฯ